Makaisemak a makakita ken nakasukain iti daytoy a ladawanmi
kadagiti kapatadak idi ubbingkam' pay. No ar-arigen, napugas
koman iti lagipko daytoy, ngem saan ta nabiagda pay laeng
a kas iti puso nga agpitpitik nga agbomba ti angin nga angsen.
Iti nasao a ladawan, arigko ti maysa a siit a naipatakder
a linikmut ti pangen dagiti apagbukar a sabong ti rosas.
Nailitak ti ladawan idi nag-reyna elena ti kabagisko,
ni Marlene Rumbaoa Rivera itan iti naangay a Flores de Mayo
ti Parokia ni San Jose iti Siudad ti Laoag.
No ania a tawen, dayta ti diak malagipen. Ngem kas pammaneknek
iti ladawan, ubbingkam' pay idi, piman.
Iti daytoy a ladawan, kaasi ti Apo, addakami pay la amin
a biag. Adda nagabrod, adda nagtalinaed iti ili a nakayanakan,
adda dagiti nagballigi iti karera nga inarapaapda ken adda met
dagiti negosiante itan.
Ni Evangeline dela Cruz [idi] ti akinkannigid a kadua ni
kabagis Marlene a nagtakder iti ngato. Iti baba: ni Peregrina
Guillermo [idi], kakannigidan amin; ni Rosario Ramos [idi],
maikadua; Siak, toy numo ti nagtakder iti tengnga; Liwliwa dela
Cruz [idi], maikapat iti ladawan ken Lydia dela Cruz [idi],
akinkannawan amin ken maikalima iti ladawan.
Bassit a talaga ti lubong a paggargarawan ngem mangibati
tunggal darikmat ken pasamak iti dinto malipatan a pakalaglagipan.
Ay, kasta a talaga ti biag!
.
.
.
.
REKUERDO: Addada Laeng iti Suli ti Panunotko
Rudy Ram. Rumbaoa
wwwlentekenladawan.blogspot.com
