Ita Nga Aldaw

Daytoy siguron ti kasasam-itan a regaloda kaniak
ita a "Father's Day," piman. Ala wen,
'maykayon ta danggayandak a mangan
iti daytoy sukog-bado a cake....
.
.
.
ITA NGA ALDAW DAGITI AMMA
Rudy Ram. Rumbaoa
wwwlentekenladawan.blogspot.com

Ama iti Anak

[Nabulod ti ladawan a naaramat]


Ama iti Anak: "Agnanayon a nakatapay
dagiti dakulapko kenka.".
.
ITA NGA ALDAW DAGITI AMMA
[Sand Sculptor-credit to the owner]

Panagpasiar

PANAGPASIAR. 

Iti hardin ti paraiso. Iti hardin dagiti agayan-ayat.

Imutektekan kinapintas ti nakaparsuaan. 

Panangsirpat kadagiti mula ken sabong a ray-aw 

ti mata. Ipeksa ti karirikna a pannakisarita kadakuada 

gaput' agdama nga angol ti sangalubongan. 

Sungbatandatay' met no ammotayo ti makisarita 

kadakuada--no ammotay' a taripatoen ida. 

Denggenda met dagiti as-asugtayo ta agbalinda

a rangtay a mangidanon ti dawattayo iti Dios.

Ti as-asugtayo a napalalo. Ti kaasi. Ti panangikakaasi. 

No mabalbalin koma, aggibusen ti agdama a krisis 

tapno agsublitayon iti normal a nakamulagatan a biag. 

Kadakuada, kabaelantay' a sarangten dagitoy 

a pannakasuot-- kadakuada, adda awis ti natalinaay 

a panagbiag no la ket awan makasabidong, wenno 

mangsabidong ken ranggas gaput' kinasariwawek 

a panunot, panagabuso ken aramid ti tao 

iti naited kadatayo a paggargarawan. 

Ngem ditay' agsuko. Ditay' paallilaw. Lumabantayo.

Agkaykaysatayo a manglaban iti dakes a panagem

ti Diablo. Agtalek. Mamati iti Namarsua.

Adda agur-uray a kappia ken kinatalged 

ti panunot nga agarapaap [manen] iti napimpintas 

a masakbayan.

Kadakuada, adda biag a marikna iti aglawlaw. 

Biag a kas kadatayo.

Ray-aw,

no salakniban ti nakaparsuaan...

.

.

.

.

ITI HARDIN TI WAILUKU

Mar. o7 Abril 2o2o

Maui

wwwlentekenladawan.blogspot.com

Iti Hardin ti Wailuku

SAKBAY a [temporario] nagrikep ti pagobraan
[Montage Club and Residences iti Kapalua, Maui]
ni baket, impadawat dagiti agtagikua kadagiti balay
a daldalusanda ti amin a mula nga orkidia a mapanawan 
ken malikudanda sakbay a nagsublida idiay Mainland 
gapu ti pangta ti COVID-19. Napan pay laeng nagpaing 
dagitoy nga owner[s] iti Mainland tapno maliklikanda 
ti pannakaakarda iti makapapatay nga agraraira a bayrus.

Anian a ragsak ni baket [kano] idi awatenna dagitoy
a mula. No baloran ti bayad dagitoy a klase ti mula,
nangina. Ket kunana: "Uray kasanot' rigatmi a mangmenmentenar
ti kinadalus iti uneg ken aglawlaw dagitoy dadakkel ken nalalawa
nga arigna mansion a balbalay dagiti babaknang, agyamankami
iti parabur a naawatmi. Pagpiaanna, adda pangay-ayoda
kadakami empleado ken mangtartaripato ti pagtaenganda
iti Maui." Ket gapu ti dayta, nagayad ti isem ni baket a
nangipresentar kadagiti mula kaniak ket dagus 
nga inyurnosna iti hardinmi.

Saan. Awan kasta a kaaduna a kas ti pampanunotem ita.
Tallopulo ket uppat a pedaso nga orkidia? Ay, pangalaanna
ti kasta a kaadu? Umanayen ti adda a maited.
Pagyamanan ti adda nga itedda. Ti nasken, adda essem
ken gagar a mangtaraken kadagitoy parabur nga orkidia
 tapno iti panagsublinto dagiti nangted kenka,
maay-ayoda met a makakita ken makaammo a dimo ida
binaybay-an. Ket gapu ti dayta, ad-adda nga agtalekda
kenka. No agtalekda kenka kadagiti  babassit a bambanag,
anianto laengen ti ad-adu? Ti bassit, mapaadu.

An-anuem ngamin aya a tagikuaen ti intero a lubong
no dika met naragsak?

Awan. Kunak lang.



ITI HARDIN TI WAILUKU
Mierkules, o1 Abril 2o2o
Maui