Hardin iti Wailuku

Uray ti mulak a bayawas, timmungrarawda met a maayatan a mainitan manen. Simmaranta a makakita ti lawag iti aglawlaw…
.
.
.
Iti Hardin ti Wailuku
11 Pebrero 2o2o
Maui

Kalpasan ti Tudo

Itay aginit. Itay kalpasan ti tudo. Kasta unayen ti lawag ti tangatang. Nangwaknit kadin, wenno agurayak pay sabali a bisibis?
.
.
.
Wailuku, 11 Pebrero 2o2o
Maui

Kros iti Bantay

Kaslanak la tantan-awan [ti panagkunak] manipud iti adayo ti kros iti bantay iti Iao Valley ditoy nagtakderak a lugar ti Wailuku. No kuan, diak makita ta malangeb kadagiti napuskol nga ulep nga aglabas iti bantay. Nupay ammok ti gapuna no apay a naipatakder dayta a kros iti bantay, maysa ketdi daytoy a pammalagip tapno silalagip ken agnanayonak nga agyaman iti Dios.
.
.
Wailuku, 11 Pebrero 2o2o
Maui

Kunak Lang...

itay bigat.
itay bigat, kalpasan
ti nagpatnag a trabaho.
kalpasan ti walo nga oras
a panagibtur ken anus a puyat,
nalpas met laengen-
inton sumuno a lawas,
addanton awaten a pirak.

ngem diak agpakada
ta agsubliakto manen
nga agpasag kenka,
sika a murmurayko
iti binigat...
.
.
.
.
awan, kunak lang.

rudy ram. rumbaoa
hm, kahului, maui
 

Iti Hardin...

panangsapul, panangtiliw.

ngem awan masapulak,
awan matiliw a balikas
a makitak iti pakabuklam
tapno masangal ti balabala
ti daniw nga isagutko met la kenka...
.
.
.
iti hardin ti wailuku
wwwlentekenladawan.blogspot.com

Iti Hardin...

Uray awan balikas a makita
ken mangngegko kenka,
maysaka a daniw kaniak..
.
.
Iti Hardin ti Wailuku
wwwlentekenladawan.blogspot.com

Iti Hardin

iti paraisok.
iti hardin ni ayat.
iti hardin dagiti agayan-ayat.
iti hardin dagiti pusok nga agay-ayat---

adda kappia.
talged ti panunot ken rikna...
.
.
.
.


iti hardin ti wailuku
rudy ram. rumbaoa
wwwlentekenladawan.blogspot.com